هبت ارياح الصبا عقب هتانه
وليلي الماطر شعل جوّي الغاني
وصورته مرت مع البرق عجلانه
وقمت اغني ليل دانه ويا داني
واعترتني حالة الشوق طربانه
كنها ترسمني اشكال والواني
اتغنج واتمايل على انغامه
وانثر الشلال من فوق الامتاني
وخصري الميّاس يطرب على شانه
ويتثنى رقص ويهز الاركاني
وعطري اللي فاح مسكه وريحانه
رشته تنعش غرامي ووجداني
يا هجوسي غني الحان فنانه
واطربي للغالي بكل الالحاني
وان رجع لك عقب صده وهجرانه
اكتبي اسمي في جبينه وعنواني
ادري ان حبي سكن دم شريانه
مثل ما حبه سكن دم شرياني
الشاعره فرس سعودية
