حنّا هل العوجا على سنان ورماح
امروية حدب السيوف الحديدة
ما نركب الغارات والشوف ما انباح
و لانطحن الا حب روس عنيدة
قصيدة الشاعر العقيد “مشعل الحارثي” أمام ولي العهد الأمير محمد بن سلمان
👇👇
يا الله يا فالج من الليل الاصباح
يا مدبر خلقك على ما تريده
تقسم لنا من جود مداتك أرباح
والحج تقبل من وقف في صعيده
يرجيك في دولة هل العز مرتاح
حل الحرام وشاهد اليوم عيدة
وانصر ملكنا و احفظه وين ما راح
بارك لنا يا الله بعمره وزیده
تسعين عام عاشها بذل وكفاح
ما فيه مجد للوطن ما يشيده
أبو فهد سلمان تزهاه الامداح
ان كان للفرسان باق شريدة
هو والله اللي يحتمي الصاح لا صاح
ويرد له بحبال عزم جويدة
من فوق سرج اللي تمذرح تمذراح
يوم اشهب البارود نار وقيدة
ما يارد الماء من على العد ضحضاح
العيلم الهداج يُنزح عقيدة
على دروب العز مسری و مسراح
الين صار الحكم لله بيده
ويوم انبثق في ظلمة الليل مصباح
كل عدل ركضه على المجد سيدة
ومن خت عن نهج العلا راح مرواح
طير تقفاه الهبوب الشديدة
ما عاد في الدعوى مصافيط ومزاح
العدل ماضي والحكومة رشيدة
عهد الملك سلمان تمكين وإصلاح
المملكة لبست ثياب جديدة
واغلى هدايا سيدي رمز وسلاح
وسلاحنا والرمز حضرة عضيدة
یا مرحبا به عد ما بارق لاح
في محفل ما كل رجل يسيده
الا الذي عنده للأمجاد مفتاح
والعز كله والشرف في رصيده
دليلة في غبة اليم سباح
عوص الامور الكايدة ما تكيدة
حرز قوي عزوم ساطي ولماح
فرز الوغى سيف الملك والعقيدة
محمد اسمه تاج للشعر ووشاح
ووسام لصدري وصدر القصيدة
طويق نجد ان كان ينزاح ينزاح
قد حاولو ما حركو فيه حيدة
في رؤيته نصر وتباشير وافراح
راهن عليها والنتيجة وكيدة
خلت حمام الورق والدوح طياح
ينزف لحون الضيم حدر الجريدة
وطير السعد لأغلى بلد رف بجناح
يطرب مسامع مملكتنا نشيدة
رؤية بطل تسمو من انجاز لنجاح
تبقى على مر السنين المديدة
بعد نظمها كلها نظم مسباح
واضفى عليها من قيمنا التليدة
وبالحق والاخلاص والرفعة آشـاح
عن وجهها يوم استدارت بجيدة
يا ام الجبين اللي كما النور وضاح
تفاخري بين الامم يا مجيدة
يا دارنا نفدي ترابك بالأرواح
وش عاد لو يأمر الشعب سيدة
عشناك يوم الجوع لارجاك مجتاح
قبل تعيشين الحياة الرغيدة
للي سواك نقدم الجهد لا أتاح
فرصه واذا ما اتاح فرصة سعيدة
ما همنا من ينطح الصوت بصياح
يشهد لنا الله والمواقف شهيدة
لا صارت الهده على كل ملواح
الله يعين اللي نزف من وريدة
جرح عميق صدق يحتاج جراح
كثر التطبب والدواء ما يفيدة
من كان ما هو للصعيبـات نطاح
لا يشتقي بالحل ساعي بريدة
بعض القضايا ما تبي شرح وايضاح
والهرج فيها ناقص مستزيدة
فن التغاضي فناً احيان ذباح
خل البعيد يروح لبعد بعيدة
حنّا هل العوجا على سنان ورماح
امروية حدب السيوف الحديدة
في الغابة اللي كلها اوحوش واشباح
لنا الاسد والنمر والذيب صيدة
ما نركب الغارات والشوف ما انباح
و لانطحن الا حب روس عنيدة
يديننا ما هيب بقصار وشحاح
تعطي و لا تعطي العطايا الزهيدة
دون الوطن ياما من الدم قد ساح
منا ولا هالحين ما جف بيدة
صبو من اللي بنها توما فاح
ما عاد باقي غير جملة وحيدة
تطيح روس وبيرق العز ما طاح
شامخ يورثة الحفيدة لحفيدة
–
