عبدالله التهامي
فن النقش بالحناء من أقدم الفنون الشعبية التي ارتبطت بالمناسبات السعيدة والطقوس الاجتماعية في كثير من الثقافات، فهو ليس مجرد تزيين للجسم، بل لغة جمالية تحمل رموزاً ودلالات قد تختلف من مكان لآخر، إذ تنتقل تصاميمه بين الأيدي جيلاً بعد جيل، وتتنوع بين الزخارف الدقيقة والرسومات الوردية والهندسيات التي تعكس ذوق الفنان وخبرته.
حاورت الصحيفة الفنانة أو النقاشة المروة الأمين ، شخصية مرموقة قدمت الكثير من الأعمال والنقوش الفنية على مستوى عظيم والتي أجابت على كثير من التساؤلات وكانت كالتالي:
س / في البداية عرفينا عن نفسك ومن أي دولة؟
أنا المروة الأمين، و خالتو مرمر زي ما بحب ينادوني. فنانة نقش حنة من السودان. بديت كهواية من البيت، وبعد الحرب وفقد الوظيفة اتحولت لمصدر دخل فعلي، وهسي حولتها لمشروع تعليمي هدفه تمكين الأخوات والبنات عشان أي واحدة تفتح مصدر رزق من بيتها، ودا من خلال سلسلة تدريبات أساسية بفيديوهات ولايفات أونلاين.
س / كيف كانت بدايتك بممارسة فن النقش بالحناء؟
بديت أنقش لنفسي ولأخواتي. لما الناس سألوا “دا شغل منو؟” طورت نفسي من الميديا مع معلمات كان ليهم الفضل الكبير. وهنا لازم أشكر أستاذتي وأختي شادية ميرغني فاشر وكل المشرفات المعاها دون استثناء، ومازلت بتدرب معاهم.
بعدها جات مرحلة التطبيق على الأقارب لحدي ما يدي ثبتت.
س / هل هناك عرابة لك وداعمة كانت سبب لتحقيق نجاحك؟
أمي الله يديها العافية وأسرتي كلها الحمدلله، وقفوا معاي وشجعوني أحول الهواية لشغل. وأول زبونة دفعت لي كانت السبب الأكبر إني أستمر.
س / ما أنواع الزبائن الذين تشتغلين لهم؟
أغلب شغلي مع السيدات والبنات في المناسبات اليومية، ما بس العرايس. بشتغل حفلات حنة صغيرة، أعياد ميلاد، سبوع، وهكذا وحتى في بنات بتحب تعمل نقش بسيط تغير بيهو مودها. وبحب شديد أشتغل مع البنوتات الصغيرة في العيد، فرحتهم بالحنة بتدي للشغل طعم تاني وبتجيب لي أمهاتهم بعدين.
س / حدثينا عن أعمالك الفنية وأبرزها؟
أبرز شغل عندي هو الورش البعلم فيها البنات والسيدات- دا فخري الحقيقي، وتاني بحب شغل “حنة العيد” والجلسات الجماعية. مرة عملت سيشن نقش جماعي لـ 5 صحبات في عيد ميلاد، كل واحدة اختارت تصميمها، والصور انتشرت جابت لي شغل كتير. يعني التسويق بيجي من السعادة.
س / هل تتبعين قالب جاهز أم تصميم من الصفر؟
انا بعتمد الاتنين ودة بيحصل مع كل النقاشات، للسيدات والبنات بجهز “كوليكشن سريع” فيهو: وردة، فرع، أسورة، رسمة على صباع واحد. الزبونة تختار في دقيقة ونبدأ. ولو اختارت شكل جاهز بنفذه بس طبعا بتكون عندي بصمتي الخاصة
اما لو السيدة طلبت حاجة خاصة، بصمم ليها من الصفر حتى لو رسمة صغيرة، عشان تحس إنها مميزة. السرعة مع التميز دا البخلي الزبونة ترجع.
س / هل واجهت صعوبات وتحديات في عملك؟
أول شي ثقة الناس. حليتها بتصوير شغلي على الزباين، ودا بحصل نادراً لأنو أغلب السيدات بترفض التصوير ودا طبعاً من حقها، تاني شي التسويق، اتعلمت أعمل ريلز في التيكتوك. والتحدي الدايم الزمن، فبقيت أوضح للزبونة من البداية إنو “الشغل السمح بياخد زمنو”.
س / ما نوع الحناء التي تستخدمينها؟ ولماذا؟
على حسب رغبة الزبونة. ممكن أستخدم الحنة السودا (الصبغة) لو بتنفع معاها، أو بستخدم حنة طبيعية 100% بعجنها بطريقة معينة أساسها بدرة خام وزيوت أصلية.
هل هناك مشاكل طبية أو تحسس للجلد من النقش والحناء؟
الخطر كلو في الحنة السوداء، عشان كدا بسأل الزبونة أول إذا عندها تحسس أو لا قبل ما أبدأ. من الطبيعية نادر جداً تحصل مشاكل. صحة الزبونة خط أحمر.
س / هل تنظمي دروس ودورات في مهنة وفن النقش؟
أيوا ودا قلب المشروع حقي، ورشي مركزة على البنات الدايرة تشتغل من البيت. في فترة وجيزة ممكن تتعلم الأساسيات
1. مسكة القرطاس الصح.
2. 4 خطوط أساسية تعمل بيها 20 رسمة.
3. 5 تصميمات عليها طلب عالي وبتتعمل في 10 دقايق.
4. كيف تصور وتسعر وترد على الزبونة في الواتساب.
هدفي أي بت تطلع مني بعد زمن بسيط تكون ماسكة أول مرتب من يدها.
شغالة أونلاين مجاناً في الواتساب والتيكتوك. عندي قروب واتساب فيهو 30 متدربة، وبعمل لايفات تعليمية، هدفي أي سيدة عندها تلفون تتعلم حرفة وتسترزق من بيتها.
س / لماذا دورات مجانية؟
لأنو الظروف صعبة وأغلب السيدات فقدن مصادر الدخل بعد الحرب. العائد حقي هو الأجر وبناء سمعة وأثر مستدام. لما سيدة واحدة تنجح دا أكبر نجاح لي.
س / ماهو أكبر تحدي في الأونلاين؟
السيدة بتتعلم نظري لكن ما عندها أدوات تطبق بيها، وممكن الأدوات البسيطة دي تحرمها من مواصلة التدريب. عشان كدا الفصل الأوفلاين مهم، لأنو بمعينات أقل بقدر أعلم عدد كبير وبشوف التطبيق قدامي.
س / ما نصيحتك لمن يريد دخول مجال النقش؟
ما تراجي موسم العرس. ابدي بالبنات الجنبك. اعملي عروض بأسعار رمزية بدون ماتخسري او صوري في يد أختك الصغيرة مثلا ونزلي الصور على حسابك .
النقش للبنات دا باب رزق يومي ما موسمي، والحبة بتعمل قبة. ولما يديك تثبت، العرايس بتجيك .
س / ماهي الخطوات القادمة لك؟
حأفتح فصل أوفلاين شبه مجاني لـ 15 بت كدفعة أولى بسعر رمزي يغطي مصروفات المعينات الأساسية قراطيس، بدرة، زيوت، كراسي. والتيكتوك والواتساب حيفضلوا منصة التسجيل والمتابعة
س /ماهي رسالتك للسيدات؟
“الحرب شالت مننا كتير، بس ما شالت مهارتنا”. دعمكم لنفسكم حيقويكم ويكتشف الإبداع الجواكم وأهم شي انه نتعلم حرفة تعفنا وتأمنا.
س / كلمة أخيرة لك وشكر لمن توجهيها.
النقش ما رسم وخلاص، دي فرحة بنختها في يد أي سيدة،وشكري لله، ثم لكل من قدم لي أي دعم من أي نوع، ولكل زبونة وثقت فيني، وشكر خاص لمعلماتي، الفضل بعد الله لهن، الأجر واصل لهن قبل ما يكون لي.
